Norsk Landbruksrådgivning overtok frå nyttår ansvaret for bygningsteknisk rådgjeving i landbruket. Tidlegare var dette oppgåva til fylkesmennene.
Rådgjevinga skal sikre bygningsmiljø og kulturlandskap, på eit felt der behovet er stort. Tenesta omfattar også langt meir enn berre tekniske teikningar med gode løysingar for produksjonen. Landbruket er produsent av kollektive samfunnsgode, og har samtidig ansvar for bygningsmiljø og landskap.
Målet med rådgjeviga er kvalitetsbygg til riktig pris, saman med omsynet til byggjetradisjon og kulturlandskap. Plassering, lokal arkitektur og tunutforming er sentrale element i arbeidet. Effektiviseringa og nye lover, blant anna i den nye dyrevelferdslova, stiller også krav til at planlegginga må få eit nytt løft.
– Den nye tenesta vil bidra til å sikre kvalitetsbygg i landbruket, som også tar omsyn til kulturlandskap og byggjetradisjonar, seier landbruks– og matminister Lars Peder Brekk.
Kjelde: LMD
